Бірінші лига: «Каспий» 14-турда өз алаңында ұпай жоғалтты

17-18 шілде күндері футболдан Қазақстан Бірінші лигасы командалары арасындағы 14-тур ойындары өтті. Турнир кестесінің көшін бастап тұрған «Каспий» өз алаңында күтпеген жерден «Жетісаймен» тең түсіп, бәсекелестерінің жақындауына мүмкіндік беріп қойды.

Матчтар нәтижесі:

«Екібастұз» – «Алтай» – 1:3

«Түркістан» – AKAS – 0:2

SD Family – «Шахтер» – 0:2

«Тараз» – «Оңтүстік» – 1:1

«Каспий» – «Жетісай» – 2:2

Ertis – «Актөбе-Ж» – 3:0

«Хан-Тәңірі» – «Қайрат-Жастар» – 0:4

 17 шілде

«Екібастұз» (Екібастұз) – «Алтай» (Өскемен) – 1:3 (0:1)

Голдар: Тетерин, 21 (0:1); Сүлейменов, 63 (1:1); Хижниченко, 75 (1:2), Мұхит, 90+4 (1:3).
Бас төреші: Пучков (Петропавл).

Тоғыз турдан бастап «Алтай» ала-құла ойнап жүрді. Біресе жеңіп, енді бірінде күтпеген жерден ұпай жоғалтты. Соңғы рет Павлодардан  Ertis клубынан басым түсті. Бұл жолы дәл осы облыстың тағы бір клубы «Екібастұзбен» кездесті. 

Вахид Масудовтың командасы бірінші таймның ортасында есеп ашып, үзіліске дейін таблодағы көрсеткіш өзгермеді.

Екінші таймда «кеншілер» таразы басын теңестіргенімен, есепті ұстап қала алмады. Бұл сәтте Қазақстан ұлттық құрамасының экс-футболшысы Сергей Хижниченко белсенділік танытты. Сосын матч соңындағы қосымша минутта Әліби Мұхит қонақтардың жеңісін түпкілікті бекітті. Қорытынды есеп – 1:3.

«Түркістан» (Түркістан) – AKAS (Алматы) – 0:2 (0:1)

Голдар: Саутов, 13 (0:1); Примбердиев, 87-пенальтиден (0:2).
Бас төреші: Сейдахметов (Талдықорған).
Алаңнан қуылды: Айдарбекұлы, 45 (AKAS).

AKAS Түркістаннан көпшілік күткендей үш ұпайын алды. Бірақ жеңіс оңай келген жоқ. Бірінші лиганың дебютанттары сапынан үзіліске шығар тұста Айдар Айдарбекұлы екінші сары қағаз алып, алаңнан қуылды.
Дегенмен, бұл кезде қонақтар Аруп Саутовтың жылдам голының арқасында есепте алда тұрған.
«Түркістан» бір ойыншыға артық ойнағанымен, мүмкіндікті пайдалана алмады. Керісінше, матч соңына қарай, екінші гол өткізіп алды. AKAS сапынан пенальтиден Шерзат Примбердиев кездесу нүктесін қойды. 

SD Family (Астана) – «Шахтер» (Қарағанды) – 0:2 (0:0)

Голдар: Нүсіп, 68-пенальтиден (0:1); Нүсіп, 77 (0:2)
Бас төреші: Мұқат (Атырау).

«Шахтердің» құрамы мен мүмкіндігіне қарап, сену қиын. Бірақ «кеншілер» екінші айналым басталғанда ғана алғаш рет маусымда қақпасына гол жібермей жеңіске жетті. 
Бұған дейін қарағандылықтар тек бір ғана матчта қақпасын голдан аман сақтап еді, ол кездесу Ertis-пен 0:0 есебімен аяқталған.

SD Family Премьер-лигаға үміткердің біріне лайықты қарсылық көрсетті. Бірақ екінші таймда «Шахтердің» ойыншыларының жеке шеберлігі мәселені шешті.  Шабуылшы Арман Нүсіп 9 минут ішінде қос гол соғып, командасына үш ұпай сыйлады.

Айтпақшы, ойыннан кейін Арман Алматыда сүйіктісіне тұрмысқа шығуға ұсыныс жасады.

18 шілде

«Тараз» (Тараз) – «Оңтүстік» (Шымкент) – 1:1 (1:1)

Голдар: Кемелбек, 4 (1:0); Амангелді, 45+4 (1:1)
Бас төреші: Сержанұлы (Алматы)
Алаңнан қуылды: Жақсылықов, 29 («Тараз»).

Тараздағы матчтың бірінші таймы өте шиеленісті өтті. Барлығы алаң иелері сапынан Санжар Кемелбектің жылдам голымен басталды. 

Бұдан кейін ойынның 30-минутында жамбылдықтар бір ойыншысынан айырылып қалды. Қорғаушы Жалғас Жақсылықов екі ескерту алғандықтан алаңнан қуылды. Ал үзіліс шығар тұста «Оңтүстік» жауапты голды соғып үлгерді.

Екінші таймда есте қалатындай ештеңе бола қойған жоқ. Таблодағы өзгеріс болмады. Қорытынды есеп – 1:1.

Ertis (Павлодар) – «Ақтөбе-Ж» (Ақтөбе) – 3:0 (2:0)

Голдар: Бөрібаев, 33 (1:0); Ағыманов, 33 (2:0); Добай, 74 (3:0)
Бас төреші: Бильдинов (Қарағанды).
Алаң иелері «Ақтөбе-Ж» командасымен өткен матчтың тағдырын үзіліске дейін-ақ шешіп тастады. Бірінші таймда Нұрғайни Бөрібаев пен Темірлан Ағыманов екі гол соқты.

Осыдан кейін қонақтар тек ірі есеппен жеңілуден аман қалуды ойлады.
Алайда «қызыл-ақтар» ірі жеңілістен қашып құтыла алмады. Алаңға қосалқы құрамнан шыққан Ertis қорғаушысы Әділхан Добай маусымдағы алғашқы голын соғып, кездесудің нүктесін қойды. Қорытынды есеп – 3:0.

«Хан-Тәңірі» (Алматы) – «Қайрат-Жастар» (Алматы) – 0:4 (0:1)

Голдар: Тұяқбаев, 37 (0:1); Қалиқұлов, 56 (0:2); Бижан, 63 (0:3); Кургин, 69-пенальтиден (0:4).
Бас төреші: Дышкант (Талдықорған)
Алаңнан қуылды: Захарченко, 70 («Хан-Тәңірі»).

Алматылық екі клубтың кездесуі дерби мәртебесіне тек алғашқы таймда ғана аздап сәйкес келді. «Қайраттың» жастар құрамасы үзіліске дейін бір голмен шектелгенімен, екінші таймда қарсыласын аяған жоқ. 

Есеп 0:4-ке жеткенде «Хан Тәңірі» сапынан Богдан Захарченко алаңнан қуылып, командасын тіпті қиын жағдайға қалдырды. 

«Каспий» (Ақтау) – «Жетісай» (Жетісай) – 2:2 (1:2)

Голдар: Дандыбаев, 8 (0:1); Тұрлыбек, 10-пенальтиден (1:1); Күлмағанбетов, 14 (1:2); Тұрлыбек, 75 (2:2)
Бас төреші: Әбдікеров (Қызылорда).

Бұған дейін «Жетісай» кез келген қарсылас үшін ыңғайсыз команда екенін жазғанбыз. Тіпті, «Каспий» өз алаңында үш ұпайды оңай аламыз десе, қателесетінін ескерткен болатынбыз. Шын мәнінде, ойында да соны байқадық. 

Қызылордалық төреші Марал Әбдікеровтің алғашқы ысқырығынан кейін 15 минут өтпей жатып үш гол соғылды.

Алдымен «Жетісай» есеп ашты, сосын Ақтау командасының маусым айындағы үздік футболшысы Мирас Тұрлыбек пенальтиден таразы басын теңестірді.Алайда «теңізшілер» қуанып үлгергенше, тағы да гол жіберіп алды.

Осыдан кейін екі команда да шабуылды бәсеңдетіп, тек 75-минутта Мирас Тұрлыбек дубль авторы атанып, есепті теңестірді.

Бұдан кейін «Каспийге» қонақтар мүмкіндік бермеді. Бірінші лиганың көшбасшысы өз алаңында күтпеген жерден ұпай жоғалтты. Дегенмен бұл нәтиже «Каспийдің» турнир кестесіндегі бірінші орнына әсер еткен жоқ.

15-турда кездесетіндер:

24 шілде

«Актобе-Ж» – «Екібастұз»

«Қайрат-Жастар» – Ertis

«Оңтүстік» – «Каспий»

25 шілде

«Шахтер» – «Хан-Тәңірі»

«Жетісай» – «Түркістан»

«Алтай» – «Тараз»

AKAS – SD Family.