Бірінші лига: маусым айының үздік ойыншысы мен үздік жаттықтырушысы анықталды

Кәсіби клубтар арасында жарыстар өткізу дирекциясы футболдан Қазақстан Бірінші лигасының 2025 жылғы маусым айындағы үздіктерін анықтады.

Бұл айда Ақтаудың «Каспий» клубының шабуылшысы Мирас Тұрлыбек теңдесіз деп танылды. «Үздік бапкер» номинациясында осы клубтың бас бапкері, жас маман Руслан Эсатов жеңіске жетті.

«Үздік ойыншы» номинациясының иегері турнирге қатысушы командалардың капитандары мен бапкерлерінің дауыс беруі арқылы анықталды. Ал «Үздік бапкерді» командалардың бас бапкерлері өзара дауыс беру арқылы таңдады.

Мирас Тұрлыбек маусым айында үш матч өткізіп, 5 гол соқты.  «Ақтөбе» жастары мен «Екібастұз» командаларына дубль жасаған. Бір голды «Ертіс» қақпасына соққан. Ол қазір Бірінші лигада үздік сұрмерген болып тұр.

Руслан Эсатовтың жетекшілігімен «Каспий» маусым айында үш ойын өткізіп, үшеуінде де жеңіске жеткен.