Абинұр Нұрымбет: Біздің басты мақсатымыз - «Ертісті» Премьер-лигаға шығару

20 жастағы қазақстандық жас жартылай қорғаушы Абинұр Нұрымбет жазғы трансферлік кезееңде Түркістанның «Тұран» клубынан Павлодардың Ertis командасына ауысты. Футболшы жаңа командасында бірден негізгі құрамнан ойып тұрып орын алды KFF League тілшісі жас ойыншымен сұхбаттасып, жанкүйерлерді қызықтырған сұрақтарға жауап алды. 

– Абинұр, сіздің «Ертіске» ауысуыңыз көптеген қазақстандық футбол жанкүйерлері үшін күтпеген жаңалық болды. Бұл трансфер қалай жүзеге асты?

– Иә, мен «Ертіс» клубына келуім көбісін таң қалдырғанын білемін. Әлеуметтік желіде де біраз пікір жазылды. Бұл ұсыныс клубтың селекцияға жауапты менеджер тарапынан түсті. «Ертіс»  алдағы жоспарлары,негізгі мақсаттары жайлы айтылды. Әрине, бұның барлығы мені қызықтырмай қоймады. Командамен белестерді бағындырып, жүлделерге қол жеткізуімізді қалаймын. 

– Премьер-лига клубтарынан ұсыныстар болды ма? Егер болса, неге дәл «Ертісті» таңдадыңыз?

– Бірқатар клубтан шақырту алдым. Маған сенім артқандардың барлығына алғыс айтамын. Дегенмен, «Ертісті» таңдадым. Бұл сарапталған шешім. Себебі бұл тарихы мол, еліміздегі беделді клуб. Команданың мақсаты айқын. Сол межеге жетуге ат салысу, бұл жеңістердің ажырамас бөлігі болу, мен үшін өте қызықты. Барлығымыз ортақ жетістік үшін барымызды саламыз.

– Маусымның екінші айналымы басталып кетті. Жеке өзіңіздің және команданың мақсаты қандай?

–  «Ертіс» алдында Премьер-лигаға шығу мақсаты қойылған. Бұл ретте, мен өз-өзіме де мақсат қоямын. Нәтижеге қол жеткізу үшін, командаға барынша пайда әкелу қажет. Павлодарға сол үшін келдім. Артылған үмітті ақтау керекпіз.

– Премьер-лигаға шығу үшін бәсекелестік жоғары – «Каспий», «Шахтер», «Алтай» секілді қарсыластар бар. «Ертістің» мүмкіндігін қалай бағалайсыз? Бұл клубтың басты артықшылығы неде?

–  Чемпионатта барлық қарсыластар өз мақсаттарына жетуге үлкен жауапкершілікпен қарайды, бұған еш күмән жоқ. Бірақ, біздің «Ертіс» биыл 60 жылдық мерейтойын атап өтуде. Жанкүйерлеріміз, бүкіл Павлодар қаласы бізден жақсы хабар күтеді. Әрине, бұл ойыншыларға қосымша жігер-қуат береді. Чемпиондыққа қол жеткізген клуб ардагерлері де біздің жаттығуларға, матчтарға келіп, «Ертістің» қандай команда екендігін еске салып, үлкен қолдау көрсетеді, сенім артады. Стадион трибуналарына жас та, кәрі де жиналып, алға жетелейді. Бұндай атмосфера әр өңірде бар деп айта алмаймын. Бұл жақта «Ертіске» деген халықтың ықыласы, махаббаты ерекше екендігіне көз жеткіздім.

 – Бұған дейін Өзбекстандағы «Андижан» сапында өнер көрсеттіңіз. Өзбекстан мен Қазақстан футболының деңгей жайлы не айтасыз?

 – Иә, «Андижан» сапында ойнап, маусымның тең жартысын өткіздім. Мен сияқты жас ойыншы үшін бұл үлкен тәжірибе деп қабылдадым. Өз ойым, Қазақстан мен Өзбекстан футболында қатты айырмашылық жоқ. Екі елде де, спортты дамыту үшін жағдай жасалып, футболға арналған жаңа бағдарламаларды іске асырып жатыр. Сондықтан ешкімді бөліп жарғым келмейді. Бауырлас халықтар бір-бірін қолдап, жетістіктеріне қуанады. 

 – Биылғы Бірінші лига маусымының жалпы деңгейін қалай бағалайсыз? Нені ерекше атап өте аласыз?

–  Бірінші лига көп күшті қажет ететін, физикаға негізделген футболы басым жарыс екендігі баршаға мәлім. Жыл сайын бұл чемпионаттағы командалардың деңгейі артып келеді, әр клуб жоғары мақсаттар қояды, бәсеке жоғары. Сәйкесінше футбол ойнау өте қызықты, жанкүйерлер үшін де ойындар тартымды деп ойлаймын.

⁠– Алдағы қыркүйек айында жастар құрамасы Англиямен ойнайды. Бұл кездесу Ақтөбеде өтеді. Осы матчтан не күтесіз?

–  Англия жастарына қарсы біз жақсы футбол көрсетеміз деп үміттенемін. Оған қоса, маңызды кездесудің Ақтөбеде ұйымдастырылуы қуантады. Қазақстан жастар құрамасында өте мықты қолдау болады деген сөз. Жанкүйерлері ерекше қала ғой, сондықтан елімізге жеңіс сыйлау үшін еңбектенеміз. Оған дейін әрбір ойыншы өз клубында көп жұмыс істеп, ел намысын қорғау үшін бабында болуы тиіс. Мен «Ертісте» ойнап жүріп, жастар құрамасына шақырылуымды абырой деп білемін.

 – Сіздің ойыңызша, «Ертіс» тек Премьер-лигаға шығып қана қоймай, келесі маусымда онда лайықты өнер көрсете ала ма?

–  Дәл қазір біздің басты мақсатымыз - «Ертісті» Премьер-лигаға шығару. Павлодарлық клуб әрқашанда жоғары дивизионда өнер көрсетіп, тек тұғырдың ең жоғары сатысы үшін күрескен. Қазіргі кезде, командаға деген аймақ басшылығының, жанкүйерлердің қолдауын негізге алса, клуб Премьер-лигаға шыққан кезде де жоғары деңгейде өнер көрсетеді деп сеніммен айта аламын.