Бірінші лига: Алтыншы турда көшбасшылар оңтүстік командаларымен кездеседі

Басталуы: 14:00

Өтетін орны: «Орталық» стадионы (Жетісай қаласы)

 

Турнир кестесінде көш бастап тұрған Ertis бұл турда бас бапкерсіз ойнайды. Өткен турдан кейін Қайрат Нұрдәулетов қызметінен кеткен болатын. Ал «Жетысай» турнир кестесінің бел ортасында тұр. Кез келген қарсыластан ұпай тартып ала алатын қарымды ұжым. Айта кетейік, Ertis осыған дейінгі бес матчта бірде-бір гол жібермеген. Ерлан Шойтымовтың шәкірттері павлодарлық команданың қорғанысын бұза ала ма екен?

 

Басталуы: 16:30

Өтетін орны: BS Arena (Ақтау қаласы)

 

Екінші орында тұрған Ақтаудың «Каспий» клубы бұл турда кестенің соңғы жағында орналасқан «Түркістанмен» кездеседі. Алайда қарсыласты менсінбеу «теңізшілерге» қымбатқа түсуі мүмкін. Өткен турда олар өз алаңында «Алтайдан» жеңіліп, алғаш рет ұпай жоғалтқан еді. Оның үстіне, «Түркістан» өткен аптада маусымдағы алғашқы жеңісіне қол жеткізіп, «Тараздан» басым түсті. Енді Руслан Эсатовтың командасы өткен турдағы сәтсіздікті жуып-шаю үшін бар күшін салмақ. Бірақ «Түркістанның» да алдын ала жеңілетін команда емес екенін естен шығармаған жөн.

 

Басталуы: 16:30

Өтетін орны: «Жас Қыран» стадионы (Алматы қаласы)

 

Бұл матч турнир кестесінің төменгі бөлігінде орналасқан командалардың текетіресі болмақ. Алматылық AKAS Бірінші лигадағы алғашқы маусымын өткізуде. Ал «Екібастұз» жыл сайын осы дивизионда ойнайтын ұжым болғанымен, биылғы көрсеткіші жанкүйерлердің көңілінен шығып жатқан жоқ. Себебі олар әлі бірде-бір ойында жеңіске жеткен жоқ. Қос команда да әзірге 5 голдан соққан. Айта кетейік, бұл – екі клуб тарихындағы алғашқы кездесу.

 

Басталуы: 14:00

Өтетін орны: «Шығыс» стадионы (Өскемен қаласы)

 

Өткен турда сырт алаңда «Каспийді» жеңіп, сенсация жасаған «Алтай» бұл жолы «Қайраттың» жастарымен кездеседі. «Қайрат-Жастар» чемпионатта тұрақсыз ойын көрсетіп келеді: бірде жарқын жеңіске жетсе, кейде күтпеген жерде ұпай жоғалтып қояды. Қазір олар турнир кестесінде Вахид Масудовтың командасынан бір саты төмен тұр. Алайда бұл матчта жеңіске жетсе, қарсыласын басып озады. Айта кетейік, былтырғы маусымда «Алтай» «Қайрат-Жастарды» өз алаңында 2:0 есебімен ұтқан болатын.

 

Басталуы: 14:00

Өтетін орны: «Намыс» стадионы (Шымкент қаласы)

 

Бұл екі команда турнир кестесінде бір-біріне өте жақын орналасқан. Әзірге «Хан-Тәңірі» «Оңтүстіктен» бір ұпай алда келеді. Алайда бұл ойыннан кейін жағдай өзгеріп кетуі әбден мүмкін. Өткен аптада шымкенттіктер сырт алаңда SD Family командасын тас-талқан етіп жеңіп, сенімділікке ие болды. Алматылықтар болса, керісінше, соңғы матчтарда сенімсіз ойнауда.

 

Басталуы: 16:30

Өтетін орны: «Орталық» стадионы (Тараз қаласы)

 

Жамбылдықтар қатарынан екі турда жеңіліске ұшырап, турнир кестесіндегі жағдайын қиындатып алды. Енді SD Family-мен болатын кездесуде жеңіске жетіп, ұпай қорын толықтыруға тырысады. Бірақ астаналық ұжым да қарсыласына оңайлықпен жол бере қоймайды. Өйткені олар да өткен турда шымкенттіктерден ойсырай жеңіліп, ұпай жоғалтқан еді. Айта кетейік, былтыр Таразда өткен осы екі команданың тартысты кездесуі 0:0 есебімен аяқталған болатын.

 

Басталуы: 16:30

Өтетін орны: «Шахтер» стадионы (Қарағанды қаласы)

 

Қарағандылық команда соңғы кездері қарқынын бәсеңдетіп алды. Соңғы екі турда олар жеңіске жете алмай, турнир кестесінде үшінші орынға сырғыды. Әсіресе, өткен турда турнир кестесінің соңғы сатысындағы «Екібастұзбен» тең ойнауы командаға ауыр тиді. Енді екі дүркін ел чемпиондары өз алаңында «Ақтөбе-Ж» командасымен кездесіп, сәтсіз серияны тоқтатуға тырысады. «Қызыл-ақтарға» да жеңіс ауадай қажеті. Себебі олар да әзірге жеңіссіз келеді.