Піралы Әлиев: «Жеңіс» командасында ұлттық құрамада ойнауға лайықты футболшылар өсіп келеді

– Алдымен, матч туралы айтсаңыз. Бүгін нәтижені қалай бағалайсыз?

– Әрине, қолда тұрған жеңістен айырылып, тең түскеніміз ұнамады. Чемпионатта әлі жеңіске жете алмай келеміз. Ұлттық құрамалардың ойынына байланысты демалысқа жақсы көңіл күйде кетуді көздеген едік. Бірінші таймда бәрі біздің жоспар бойынша өрбіді. Ал екінші кезеңде қарсылас бір адамға кем ойнады. Бірақ мұны пайдалана алмадық. Қайта бес минуттан кейін біздің Сағи Совет те алаңнан қуылып кетті. Сөйтіп жеңісті беріп қойдық. Тең есепке қанағат тұтуға тура келді. Концентрация жетіспеді деп ойлаймын. Допқа көбірек иелік етуіміз қажет еді. Ал біз оның орнына артқа қатты шегініп, айып алаңымыздан шықпай қалдық. Қарсылас қаптал арқылы айып алаңына доп асырумен болды. «Жеңістің» ескі проблемасы – ол стандарттан гол жіберу. Бұл жолы да солай болды. 

Жалпы алғанда, жігіттерге рахмет айтамын. Командамен төрт матч жұмыс істедім. Олар осы ойындарда өздерін жақсы жақтарынан көрсетті. Басшылыққа рахмет айтамын. Қазақстан кубогында қарсыластан басым түсіп, жартылай финалға өттік. Өкініштісі, чемпионатта әлі жеңіске жете алмай жүрміз. Ұлттық құрамалардың үзілісінен кейін өз алаңымызда үш ұпай алуымыз тиіс матчтар бар. Сол мүмкіндікті мүлт жібермеу керек. Көп жұмыс күтіп тұр. Сіздер арқылы жанкүйерлерден кешірім сұрағым келеді. Олар стадионға келіп, бізді қолдайды. Рахметтен басқа айтарымыз жоқ. Өкінштісі, оларға жеңіс сыйлап, сыйлық жасай алмай жатырмыз. Бірақ жеңіс міндетті түрде болады. Оның саны біреу емес, бірнеше болуы тиіс. Сол жолда еңбек етеміз. 

– Мен келгеннен бері команда 4 ойында 5 гол соқты: біреуі Кубокта, одан кейін «Астанамен» чемпионатта екі рет, тағы екеуін «Ордабасы» қақпасына салдық. Оған дейін жалпы үш гол ғана болған. Сондықтан оң динамика бар. Өкінішке қарай, қазір қорғаныс шебіміз шетінеп кетті. Қақпамыз кіретін гол көбейді. Барлық бағытта жұмыс істеу қажет.

Командамызда сапалы қазақ ойыншылары да, легионерлер де бар. Баланс жақсы сақталған. Дәл қазір бір жеңіс керек, сол кезде сәтсіздік жойылады. Бүгін Нұрбол Әнуарбеков пен Аслан Әділ мергендік танытты. Бұл жігіттерге сенім арттым, олармен көбірекпен сөйлесемін. Сенімді ақтап жатыр. Не істеу керек екенін біледі. Оларды дамытуды жалғастырамыз. Бізде ұлттық құрамаға лайықты жергілікті ойыншылар бар. Мүмкіндік беріп, деңгейлерін арттыруға жұмыс істеуіміз қажет. 

– Бұл басшылыққа қойылатын сұрақ. Біз әзірге жарақат алғандардың орнына мәжбүрлі трансферлер ғана жасадық. Негізінен шабуылшылар келді. Командаға қосылған испаниялық футболшы Мику толық бабында болмады. Бірақ көбірек жүктеме беріп, физикалық дайындығын жетілдіріп жатырмыз. Соған қарамастан командаға өз пайдасын тигізе бастады. Кубокта гол соғып, есепті теңестірді. 

– Иә. Әсіресе чемпиондық міндет болмаса, біздің жігіттер ойнасын дегенді әрдайым айтамын. Мен сол футболшылардың киім ауыстыратын бөлмесінен шыққан адаммын. Олардың ішкі дүниесін білемін. Бізде ұлттық құрамаға шақыруға лайық жігіттер бар. Кейін арасынан Еуропада доп тебуге лайықтары да табылады. Оларға сену керек. Мысалы, осыған дейін Аслан Әділ алаңға аз шыққан. Онымен сөйлестім. Мүмкіндік беріп едік, сенімді ақтады. Мен оны ұлттық құрамаға үміткер деп санаймын. Осындай жігіттер көп, оларды бақылап, мүмкіндік беру қажет.

– Жарақаты әсер етті. Ерте ауыстыруға тура келді. Мартинш – бұл біздің орталық алаңдағы шешуші ойыншымыз. Ол бір паспен шабуылшыны бірге-бір шығаруы мүмкін. Допқа көбірек иелік етіп, ойынды жүргізеді. Оның жоқтығы әлбетте білінді. Бірақ біз тактиканы өзгертіп, басқаша ойнауға шешім қабылдадық. Мартиништің орнына шыққан футболшы гол соқты. Оның жарақаты қаншалықты ауыр екенін медициналық тексерістен кейін білеміз. Өзі негізі ойын алдында толық дайын болмаған еді. Бәлкім, соның әсері де шығар, бірден жарақат алды. 

– Бізде оған дейін екі апта бар. Алдымен жігіттер біраз демалады, кейін әлсіз тұстарымызды жақсартамыз, қолымыздан келетін артықшылықтарымызды күшейтеміз. Жұмыс көп. Меніңше, команда жақсы. Кубоктың жартылай финалына шықтық – бұл лайықты нәтиже. Чемпионаттың көшбасшыларымен болған ойындарда да жақсы өнер көрсеттік. Кейбірінде есепте алда тұрдық. «Астанамен» ойында 88-минутта гол жібергеніміз бар. «Жетісумен» матчта да соңғы жағында солай болды. Аздап сәттілік жетіспей жатыр. 

– Жақсы сұрақ. Әли – менің ағам және тәлімгерім. Ол мені керек кезде мақтауы да мүмкін, сынын да айтуы ықтимал. Егер қаласам, штабына кіріп, жалақымды алып жүретін едім. Алайда біздің тәрбиеміз басқа. Әркімнің өз жолы бар. Оның мақсаты бар, оған жетті. Ұлттық құраманы жаттықтыру – бапкер үшін ең жоғарғы деңгей. Ағама сәттілік тілеймін, қалай жұмыс істейтінін білемін. Түнде ұйықтамайды, халыққа жеңіс сыйлауды ойлайды. Менің өз жолым бар – әлі оқып, дамуға тиіспін. Біздің тек көзқарастарымыз емес, жолдарымыз да бөлек.

– Иә, Түркияда төрт жыл жұмыс істедім: «Истанбулспордың» U-17 және U-19 құрамаларын жаттықтырдым. Бас бапкер кеткенде, уақытша міндет атқарушы болып тағайындалдым. Бұл, мүмкін, тағдыр. Сол кезде екі матчты сеніп тапсырды. Біреуі – Түркияның атақты клубы «Галатасарай» болатын. Қазір «Жеңістің» екі матчын сеніп отыр. Тағдыр сынайды, бірақ бұл құнды тәжірибе. Басшылыққа сенім білдіргендері үшін алғыс айтамын. Мамандарымызға да сенім артылсын деймін. Сеніңіз, бізде лайықты бапкерлер бар. Болашақта чемпионатта тағы көп мықты жергілікті мамандар пайда болады деп сенемін.