Екінші лига: алтыншы турда «Оңтүстік-батыс» конференциясында көшбасшы ауысты

13-14 мамыр күндері футболдан Қазақстанның Екінші лигасының алтыншы тур ойындары өтті. Осыдан кейін «Оңтүстік-батыс» конференциясында көшбасшы ауысты.

 Матчтардың нәтижесі:

«Солтүстік-шығыс» конференциясы:

«Жеңіс-Ж» – «Елімай-Ж» – 0:0
«Жетісу-Ж» – «Тобыл-Ж» – 3:2
«Ұлытау-Ж» – «Оқжетпес-Ж» – 2:2
«Шахтер-Ж» – «Алтай-Ж» – 3:2
SD Family – «Астана Ж» – 0:2

 Бұл турдың шымылдығын Астанада «Жеңіс» пен «Елімай жастары ашты. Бірақ олар өз жанкүйерлерін голмен қуанта алмады. Ойын 0:0 есебімен аяқталды. 

Одан кейінгі «Солтүстік-шығыс» конференциясы қызықты өтті. Мысалы, Талдықорғандағы «Жетісу-Ж» мен «Тобыл-Ж» арасындағы ойын драмаға толы болды. Екі команда бес гол соғып, «Жетісу» жастары осы конференциядағы үздіктердің бірін 3:2 есебімен жеңіп кетті.

Жезқазғанда «Ұлытау» мен «Оқжетпес» жастары тең түсті. Көкшетау командасы 10 ойыншымен жүріп, таразы басын теңестірді. Қонақтар екінші таймда бір ойыншыға кем ойнаған болатын. қорытынды есеп – 2:2.

Қарағандыдағы «Шахтер» мен «Алтай» жастарының ойыны қызықты өтті. Екі команда кезек-кезек алға шығып, нәтижесінде 3:2 есебімен алаң иелері басым түсті. «Шахтер» жеңіс голын төреші қосқан қосымша бесінші минутта соқты. 

«Астананың» жастары жарап тұр. Олар жеңіс сериясын жалғастыруда. Сапар Қарынбаев шәкірттері кезекті үш ұпайын SD Family-Ж» командасымен ойында еншіледі. 

Конференция «Оңтүстік-батыс»:

«Мақтаарал» – «Каспий-Ж» – 4:3

«Тұран-Ж» – «Жайық» – 1:2

«Қайсар-Ж» – «Ордабасы-Ж» – 3:2

«Арыс» – «Жас Қыран» – 5:1

«Атырау-Ж» – Jeyran – 4:1.

«Оңтүстік-батыс» конференциясында «Мақтаарал» мен «Каспий-Ж» голға қарық қылды. Үзіліске дейін алаң иелері 3:1 есебімен алға шыққан. Бірақ қонақтар екінші таймда таразы басын теңестіріп үлгереді. Алайда бәрібір де ұпай ала алмады. Төреші соңғы ысқырығын шалғанша, «Мақтаарал» төртінші голын соғып, жеңісті жұлып алды. Сөйтіп қатарынан екі жеңілістен кейін үш ұпайға қол жеткізді.

Жаңадан құрылған Батыс Қазақстанның «Жайық» командасы жеңісті жорығын жалғастырып жатыр. Олар қатарынан төртінші ойында қарсыласынан басым түсті. Бұл жолы сырт алаңда Түркістанның «Тұран-Ж» командасын қапы қалдырды. «Тұран» жастары» жылдам есеп ашқанымен, адуынды қарсыласқа төтеп бере алмады. 

Алтыншы турға дейін ұпай жоғалтпаған «Жас Қыран» бұл жолы ойсырай жеңілді. Алматы командасы  Түркістан облысының «Арыс» командасына қонаққа барған. «Жас Қыран» екінші таймның көп бөлігін бір адамға кем өткізді. Өйткені алаңнан жартылай қорғаушы Бақтияр Елбаев қуылып кетті. Тіпті, қонақтардың 81-минутта тағы бір футболшысы Роланд Хануев қызыл қағаз алып, алаңдағы ойыншылар саны 9-ға дейін азайды. Сөйтіп Алматы командасы 1:5 есебімен ойсырай жеңілді. Осының арқасында жеке нәтижеге байланысты «Арыс» бірінші орынға шықты. Қазіргі кезде» «Арыс», «Жайық», «Жас Қыранда» 12 ұпайдан бар. 

Жақында премьер-лигада «Ордабасы» Қызылорданың «Қайсар» клубын 5:0 есебімен жеңген. Осы жолы «Қайсар» жастары ағаларының есесін қайтарды. 

Тағы бір ірі есеп «Атырау-Ж» – Jeyran арасында тіркелді. «Мұнайшылар» Алматы командасы қақпасына төрт гол салды. Екінші лиганың дебюттантары тек бір дәл соққымен жауап қайтара алды. 

Енді Екінші лиганың жетінші тур ойындары 20-21 мамыр күндері өтеді.