Премьер-лига: 11-турдан кейін «Астана» көш бастады

30 және 31 мамыр күндері футбодан Қазақстан Премьер-лигасының 11-тур ойындары өтті. Бұл тур қорытындысы бойынша «Астана» командасы турнир кестесінде бірінші орынға көтерілді.

Матчтардың нәтижесі:

«Елімай» – «Астана» – 0:2

  «Жеңіс» – «Ордабасы» – 2:2

  «Тобыл» – «Атырау» – 5:0

  «Ақтөбе» – «Қайрат» – 1:2

«Ұлытау» – «Тұран» – 2:1

  «Оқжетпес» – «Қызылжар» – 3:2

«Қайсар» – «Жетісу» – 2:2.

 
30 мамыр

 «Елімай» (Семей) – «Астана» (Астана) – 0:2 (0:1)
Голдар: Кәрімов, 32 (0:1). Камара, 54 (0:2).
Бас төреші: Суликанов (Ақтөбе).

Екі команда үшін де Семейдегі ойын маңызды еді. «Астана» жеңіске жетсе, үзіліске көшбасшы ретінде кетеді. Ал «Елімайдың» бағы жанса, алғашқы үштікке жақындай түсетін.



Ойынға келсек, алаң иелері алғашқы минуттан шабуылға шықты. Трибунадағы лық толы жанкүйердің қолдауы да командаға қосымша күш берді. Бірақ матчтың басында Иван Свиридов пен Жан-Әли Пайруз өз мүмкіндіктерін мүлт жіберді. 

 Есесіне, «Астана» бапкері сенім артып, алғашқы минуттан ойынға қосылған Рамазан Кәрімов командасын алға шығарды. Үзіліске дейін осы есеп өзгермеді. 

Екінші таймда елорда командасы есепті еселей түсті. Алаң иелері жасанды офсайд жасаймыз деп қателесіп, оны Усман Камара сәтті пайдаланып кетті. Бұдан кейін таблода өзгеріс болмады. Қорытынды есеп – 0:2.

«Астана» екінші жыл қатарынан Семейде «Елімайды» жеңіп отыр. Сөйтіп турнир кестесінде бірінші орынға көтерілді.

«Жеңіс» (Астана) – «Ордабасы» (Шымкент) – 2:2 (2:0)

Голдар: Ануарбеков, 3 (1:0). Әділ, 38 (2:0). Малый, 74 (2:1). Венизелу, 90-автогол (2:2).
Бас төреші: Ысқаов (Қостанай).

 «Жеңіс» – лигадағы әлі жеңіс дәмін татпаған жалғыз клуб. Астана командасы осы олқылықтың орнын толтыруға бұл жолы жақын болған. «Ордабасымен» матчта екі доп айырмасымен алда тұрды. Бірақ тең ойнауға үйреніп қалған команда бұл жолы да сол үрдістен жаңылмады. 



Алаң иелері есепті ойынның небәрі үшінші минутында ашқан. Ануарбеков мергендігімен көзге түсіп, «Жеңісті» алға шығарған. Сосын Аслан Әділ 38-минутта есепті 2:0-ге жеткізді. Бірақ екінші таймда б»рі өзгерді. Шымкент командасы таразы басын теңестіріп үлгерді. Қорытынды есеп – 2:2. 

«Тобыл» (Қостанай) – «Атырау» (Атырау) - 5:0 (3:0)
Голдар: Зуев, 14 (1:0). Чесноков, 16 (2:0). Эль Мессауди, 42 (3:0). Асранкулов, 78 (4:0). Жұмашев, 85 (5:0).
Бас төреші: Ноженко (Талдықорған)
Алаңнан қуылды: Гадрани, 23 («Атырау»).



Маусым басталғалы «төбесі жабық манежде ойнаған «Тобыл» көктемнің соңғы күндерінде «Орталық» стадионға оралды. Бұл қадамдары сәтті болды. Нұрбол Жұмасқалиев шәкірттері жергілікті жанкүйерлерді қуанта білді. Турнир кестесінің соңғы орынында жүрген «Атырау» командасын қабылдап, жауапсыз бес гол соқты. 

 «Ақтөбе» (Актөбе) – «Қайрат» (Алматы) – 1:2 (0:0)
Голдар: Байдәулетов, 54 (1:0). Мартынович, 74 (1:1). Сәтпаев, 87 (1:2).
Бас төреші: Затула (Өскемен)
Алаңнан қуылды: Громыко, 70 («Қайрат»); Умаев, 90+8 («Ақтөбе»).


Осы турдың орталық ойыны өтті. Ақтөбеде өтті. Жергілікті қаламен аттас «Ақтөбе» Алматыдан келген «Қайратты» қабылдады. Матчтың билеті 44 минуттың ішінде толық сатылып кетті. Бұл ойында барлығы болды. Гол да соғылды, ойыншы да, бапкер де алаңнан қуылды. Бір голды төреші есепке де алмады. 

Кездесудегі есеп 54-минутта ашылды. Оралхан Өміртаевтың сол қапталдан берген пасын 2006 жылы туған жас футболшы Аян Байдәулетов керегін жаратып, «Ақтөбені» алға шығарды. Бұл оның Премьер-лигадағы дебюттік голы болатын. 

«Қайрат» осыдан кейін тайлы-тұяғымен таразы басын теңестіруге ұмтылды. Бұл жоспарлары жүзеге асқан. Алайда Дастан Сәтпаевтың алғашқы голын VAR-дың көмегімен төреші есепке алмады. Оның үстіне, гол соғылар алдында Валерия Громыко «Ақтөбе» ойыншысын шынтағын ұрып жіберді деп алаңнан қуды.

Бірақ «Қайрат» берілген жоқ. Команда капитаны Александр Мартынович стандарт кезінде ұрымтал сәтті пайдаланып, есепті теңестірді. Сосын ойын соңына қарай жас сұрмерген Дастан Сәтпаев Влад қорғаған қақпаның тоғыздын дәл көздеді. Қорытынды есеп – 1:2. «Ақтөбе» осы жеңілістен кейін үшінші орынға сырғыды. Ал «Қайрат» екінші орынға көтеріліп, Дастан Сәтпаев 8 доппен сұрмергендер арасында алға шықты.

31 мамыр

«Ұлытау» (Жезқазған) – «Тұран» (Түркістан) – 2:1 (0:1)
Голдар: Дорофеев, 21 (0:1). Таубай, 60 (1:1). Абылайхан, 73 (2:1).
Бас төреші: Сахи (Қызылорда).



Премьер-лиганың дебютанты біртіндеп жоғары лигаға бейімделіп келеді. Бастапқыда сенімсіз ойнаған «Ұлытау» қатарынан екінші жеңісіне қол жеткізді.

Керісінше, «Тұранның» нәтижелері төмендей бастады. Жезқазғанға келер алдында түркістандықтар «Ұлытаудан» алты ұпай алда тұрған еді, бірақ «Металлург» стадионындағы кездесуден кейін бұл айырмашылық екі есеге қысқарды. Көрермен қауым бұл матчта екі түрлі таймға куә болды. Алғашқы кезеңде қонақтар толықтай басымдық танытып, Константин Дорофеевтің голымен алға шыққан. Алаң иелері үзіліске дейін тек сары қағаз алумен көзге түсті.

Екінші таймда алаңда Иван Азовскийдің командасы толықтай үстемдік құрды. Тіпті, 13 минуттың ішінде екі гол соғып, жеңісті жұлып алды. 

«Оқжетпес» (Көкшетау) – «Қызылжар» (Петропавл) – 3:2 (1:0)
Голдар: Жұмат, 10-пенальтиден (1:0). Жаңғылышбай, 55 (1:1). Йованович, 73 (2:1). Марат, 89 (3:1). Горшунов, 90+1 (3:2).
Бас төреші: Тевяшов (Орал).
Алаңнан қуылғандар: Валгушев, 36 («Қызылжар»). Дарабаев, 38 («Оқжетпес»).



Солтүстік дербиде қызу тартысқа куә болдық. Бұл матч та Ақтөбеде өткен ойыннан еш кем түспеді. 
Бес гол, екі қызыл қағаз, пенальти және финалдық ысқырыққа дейінгі шиеленіс – «Оқжетпес» пен «Қызылжар» арасындағы кездесудің айнымас сипаты болды.

Алаң иелері Петропавл командасының төрт матчқа созылған жеңіліссіз сериясын бұзды. «Оқжетпестің» Дәурен Жұмат, Дамир Марат секілді ойыншылары қазір команданы сүйреп жүр. Бұл жолы да мергендіктерімен көзге түсті. Осы жеңістен кейін олар 20 ұпаймен турнир кестесінде бесінші орынға көтерілді. 

«Қайсар» (Қызылорда) – «Жетісу» (Талдықорған) – 2:2 (0:0)
Голдар: Жалмұқан, 57 (1:0). Шмидт, 67 (1:1). Ковель, 88 (1:2). Мырзағалиев, 90+7 (2:2).
Бас төреші: Горда (Көкшетау).



Бұл турдың соңғы ойыны Қызылордада өтті. Соңғы екі матчта жеңіске жеткен «Қайсар» өз алаңында Талдықорғанның «Жетісу» клубын қабылдады. Самат Смақов шәкірттері бұған дейін «Ақтөбеден» үш ұпай алып, жақсы көңіл күйде еді. 

Матчқа келсек, тек екі таймда қыза түсті. Қонақтардың қорғаныстағы қателігін тиімді пайдаланған Дидар Жалмұқан 57-минутта есеп ашты. «Жетісу» командасына есепті теңестіру үшін көп уақыт қажет болмады: Дмитрий Шмидт жеке шеберлігінің арқасында таблодағы көрсеткішті теңестірді. 

Ойын аяқталуға аз қалғанда, бұрыштамадан кейін қонақтар екінші голын соғып, жеңіске жақындағандай болған. Бірақ «Қайсар» соңына дейін берілмеді. Төреші қосқан алты минуттың соңғы секундтарын тиімді пайдаланып, есепті 2:2-ге жеткізді. Сөйтіп екі команда бір ұпайға қанағат білдірді. 

Премьер-лига енді екі аптаға үзіліске шығады. Бұл үзіліс Қазақстан ұлттық құрамасының 2026 жылғы әлем чемпионатының іріктеу матчтарына қатысуына байланысты болмақ.

12-тур ойындары:

14 маусым

 «Жетісу» – «Қайрат»
 «Қызылжар» – «Ақтөбе»
 «Атырау» – «Ұлытау»
 «Тұран» – «Жеңіс»

15 маусым
 «Астана» – «Оқжетпес»
 «Ордабасы» – «Елімай»
 «Қайсар» – «Тобыл».