Әділет Омарбек: «Алтай» ҚПЛ-ға шығуды мақсат етіп отыр

Бірінші лиганың сегіз туры артта қалды. Көшбасшылардың қатарына Өскеменнің «Алтай» клубы қосылды. Шығыс Қазақстанның командасы «Каспий», «Шахтер» секілді Бірінші лигадағы азулы ұжымдарды жеңді. Команданың көшбасшыларының қатарында шабуылшы Әділет Омарбек те бар. Тараз футболының түлегі қазір сұрмергендердің көшін бастап тұр. Биылғы маусымды сәтті бастаған футболшымен KFF League сайтының тілшісі сұхбаттасып, жанкүйерлерге кеңірек таныстыруды жөн көрді. 

– Әділет, алдымен хал-жағдайың қалай? Жаңа футбол маусымы қаншалықты көңіліңнен шығып жатыр?

– Бәрі тамаша, рақмет! Көңіл күй жақсы, маусым сәтті басталды. Бірінші кезекте команда үшін сосын өзім үшін де әзірге бәрі керемет. Жоспар бойынша келе жатырмыз деген сенім бар. Команда ішіндегі атмосфера да жақсы қалыптасқан, нәтиже де жаман емес. Жалпы, жұмыс істеп, процесстен ләззат алып жүрміз. 

–  Қазір сен бомбардирлер тізімінде көш бастап тұрсың...

–  Шынымды айтсам, бәрі –  көп жылғы еңбек, табандылық пен ішкі сенімнің жемісі. Кішкентай кезімнен бір ой санамда қалып қойған: «Сенің қолыңнан келеді, тек тоқтама». Қазір, бәлкім, сол ұзақ жолдың алғашқы жемісін көріп жатқан шығармын. Бітпейтін жаттығулар, шаршау мен күмән арқылы келген мотивация –  бәрі кездейсоқ емес. Бұл – жай ғана жүйелі жұмыс, ол енді нәтиже бере бастады.
 
–  БАҚ өкілдері «джокер» деп атап жүр. Бұл лақап ат саған ұнай ма?

–  Бастапқыда аса мән берген жоқпын. «Жай айта салған шығар» деп ойладым. Бірақ кейін қарасам, біраз адам айтып жүр, таныстарым да солай атай бастады. Қазір тіпті өз атым сияқты қабылдаймын. Бір жағынан, жағымды, демек ел қарап отыр, бағалап жатыр дегендей. Егер ат қойылған екен енді соған сай болу керек. Сол лақап ат тек жарқын әрі нәтижелі сәттермен байланыссын деп тырысамын. 

– Биыл «Алтай» клубын тәжірибелі жаттықтырушы Вахид Масудов басқарып отыр. Онымен тіл табысу қиын болған жоқ па?

–  Шынын айтсам, бұл жағынан еш қиындық болмады. Себебі Вахид Юнусовичті мен жас кезімнен білемін, құрметтеймін. Ол кісі мен үшін әрдайым үлкен тұлға –  футболшы ретінде де, бапкер ретінде де, адам ретінде де. Сондықтан шақырту алған сәтте қуана келістім. Ал қазір команданың ішінде оның үлесі әр жаттығуда сезіледі. Әр ойыншының мықты тұстарын ашуға көмектеседі, бағыт береді – бұл бағалауға тұрарлық құрмет. 

–  Команда алдында қандай мақсаттар тұр? «Алтайдың» Премьер-лигаға шығуы мүмкін бе?

– Мақсатымыз айқын.  Бізге «маусымды өткізе салу» емес, жоғары орындар үшін таласу маңызды. Әр матч біз үшін финал секілді. Әрине, арманымыз — Премьер-лигаға шығу. Қай футболшы мұны армандамасын? Біз де соның жолындамыз. Облыс басшылығының, жанкүйерлердің қолдауы бар. Оны шын сезіп жүрміз. Сол сенімді ақтау үшін бар күшімізді салып ойнап жатырмыз. 

–  Былтырғы маусымды «Ұлытауда» өткіздің. Ол жақта қалғың келмеді ме? «Алтайға» ұсыныс кімнен түсті?

– Маусым біткен соң мені бас бапкер өзі шақырды. Маусымның бірінші бөлігін «Ұлытауда» өткіздім. Кейін «Жетісайға» ауысып, сол жақта жақсы ойын тәжірибесі жинап, өзіме деген сенімділігім артты. Бұл өсуіме үлкен көмегін тигізді. Ал «Ұлытаудан» нақты ұсыныс болмады. Сондықтан «Алтайдан» шақырту түскен сәтте көп ойланбай келістім.

– Жақында «Ұлытау» «Ордабасыны» жеңді. Олар Премьер-лигада қалуы мүмкін бе?

– Егер қазіргі деңгейін ұстап, тырысатын болса — әбден мүмкін. Потенциал бар. Бірақ футбол деген — болжап болмайтын ойын. Уақыт көрсетеді. Жеке өзім сәттілік тілеймін.

– Әділет – Тараз футболының түлегі екенсің. Футболға қалай келдің. Отбасың туралы айтсаң. Сенен басқа спортшы бар ма?

– Басқалар сияқты бәрі футбол орталығынан басталды. 7 жасымда бірінші рет жаттығуға бардым. Содан бері доп – менің ең жақын досым. Отбасымызда екеуміз – мен және ағам. Ағам спортпен айналыспайды, өз саласы бар. Бірақ әрдайым қасымда болды, қолдап жүрді. Ал мен болсам – алаң мен бутсыны таңдадым. Отбасында бір адам шөптің үстінде, алаңда жүгіріп жүруі керек болды-ау деймін!

– Әңгімеңе рахмет! Сәттілік тілейміз!