Сұрмерген Сәтпаев, көшбасшы «Астана», тең ойыны көп «Жеңіс». ҚПЛ-дың көктемгі кезеңі қалай өтті

Бұл командалардың турнирдегі өнерін алдын ала талдауға мүмкіндік беретін жеткілікті мерзім.

Әрине, маусым соңына дейін турнир кестесіндегі жағдай бірнеше рет өзгеруі мүмкін, бірақ кейбір болжамдарды сенімді түрде жасауға болатын да шығар.

Айталық, кім чемпиондық пен жүлделі орындарға таласатыны байқалып қалды. Сол секілді тек Премьер-лигадағы орнын сақтауға жанталасатындардың да қарасы белгілі. 

Қазіргі уақытта бірінші мен жетінші орындарда тұрған командалар жоғары позициялар үшін үмітті болса, ал сегізінші орыннан төменгі орындардағы клубтардың басты мақсаты – Премьер-лигада қалу.

Көктемгі кезеңнің қорытындысы бойынша «Астана» көшбасшы. Былтырғы чемпион «Қайрат» елорда командасынан бір ұпайға қалып тұр. Үздік үштікте «Ақтөбе» бар. Төртінші орында келе жатқан «Тоболдың» ұпайы астаналықтардан төрт ұпай кем. Дегенмен, Қостанай командасы алғашқы үштіктегі командадан екі матчқа аз өткізген.  Осы жағын да ескеруіміз қажет. 

Көшбасшылардан сәл қалып келе жатқан Шымкенттің «Ордабасы» клубының да екі ойыны кем. Олардың бірінші айналымда «Тобылмен» матчы кейінге шегерілді. Бұл ойынның нәтижесі де турнир кестесіндегі жағдайға біраз әсер етеді. 

Дәл осындай жағдай «Елімайға» да қатысты. Әзірге өздері қалаған ұпайды жинай алмай жатыр. Семейлік ұжымның қорғанысы тәп-тәуір. Гол жібермеу жағынан Премьер-лигада «Тобылдан» кейін екінші орында. Бұл команданың осал тұсы шабуыл шебі. Андрей Карпович трансферлік үзіліс кезінде осы жағын реттеп алса, жоғары орындардан көрінуге мүмкіндігі жеткілікті. 

Ал гол соғу жағынан аса қиындық көрмей жүрген ұжымның бірі  - «Қайрат». Алматы командасы 12 матчта 26 гол соққан. Бұл орташа есеппен әр матчқа 2,1 голдан келеді екен. Оның үштен бір бөлігі – 16 жастағы Дастан Сәтпаевқа тиесілі (8 гол соққан). Оның гол соғу көрсеткіші ҚПЛ-дегі үш клубтан жоғары. Атап айтсақ, «Ұлытау», «Жетісу» және «Жеңіс» Дастаннан аз гол салған. 

Қазақстан футболының басты үміті клубта тұрақты ойын тәжірибесінің арқасында «Қайраттың» көшбасшына айналып үлгерді. Ол әрбір матчта маңызды голдар соғып, командасына өз пайдасын айтарлықтай тигізіп жатыр.

Позитивті тосынсыйдың бірі – «Оқжетпестің» сенімді қадамы. Былтыр Бірінші лигада ойнаған команда келе сала, ұпай санын 20-ға дейін жеткізіп алды. Олар тек әлсіздерді емес, «Елімай» мен «Қайрат» секілді фавориттерді де сырт алаңда жеңіп кетті. Команда үшінші орындағы «Ақтөбеден» бір матчқа аз өткізген. Егер ол ойынды жеңер болса, жүлделі орындарға да жақындай түсей алады. 

Әлбетте, Андрей Ферапонтов командасының әлеуеті қаншаға жетеді, ол жағын енді уақыт көрсетеді.

«Қызылжар», «Тұран» және «Қайсар» Премьер-лиганың орта тұсында келе жатыр. Оларға төменге түсіп кететін қауіп те байқалмайды. Жүлдеге таласа қояды деп те айту қиын.

Олардың маусымдағы қозғалыс динамикасы әр түрлі. Түркістан клубы маусымды сенімді бастағанымен, кейін сәл бәсеңдеді. Ал Петропавл мен Қызылорда командалары басында көп ұпай жоғалтқанымен, қазір жағдайларын біраз реттеп алды. 

«Қызылжардың» нәтижесін жақсарту үшін бас бапкерді ауыстыру қажет болды. Ал тек қазақ жігіттерінен жасақталған «Қайсар» Виктор Кумыктовтың жетекшілігімен азулы қарсыластарға төтеп беріп жүр. Өз алаңында «Қайрат» пен «Астанамен» тең ойнап үлгерді.

Турнир кестесінің төрт төменгі сатысында «Жетісу», «Ұлытау», «Жеңіс» және «Атырау» орналасқан. Бұл топта астаналық команданың болуы қызық жағдай. Өйткені олар 11 матчтың тек төртеуінде жеңілген. Бірақ аты «Жеңіс» болғанымен, әзірге жеңістері болмай тұр. Пірәлі Әлиев шәкірттері жеті кездесуде тең тарқасқан. 

«Жетісу» мен «Ұлытау» да ұзақ уақыт жеңіске жете алмады. «Жетісу» жиі тең ойнаса (қазір 6 тең ойын бар), ал дебютант «Ұлытаудың» гол соғуы өте қиынға соқты. Жезқазғандықтар он турға дейін кестенің төменгі жағында болып, Премьер-лигадан түсіп қалу қауіпі жоғары бірінші кандидат саналған. Бірақ қатарынан екі жеңіс оларды төменгі қатардан көтеріп, ештеңеден үміт үзбеу керектігін көрсетті.

Жезқазған клубынан үлгі алу қажет команда – «Атырау». Қазіргі кезде мұнайшылардың жағдайы өте нашар. Бірінші турдан кейін олар кестеде «Астана», «Қайрат» және «Ақтөбеден» алда тұрса, одан кейін 12 матчта бар-жоғы 1 ұпай жинады. Екі бапкер, бір директор ауыстырып тастаған ұжым 13 матчта 32 гол жіберіп үлгерді. 

Алайда алдын-ала ешқандай болжам жасауға келмейді. Ешкімге де үмітті үзуге болмайды. Алда әлі талай матч бар. Командаларға турнир кестесіндегі жағдайларын жақсартуға, ұпайларын арттыруға мүмкіндік жеткілікті. Сондықтан қызықтың бәрі алда деп айтуға толық негіз бар.