Нұрбол Әнуарбеков: Алаңда достық жоқ, тек жеңіс жету мақсаты ғана болады

Астананың «Жеңіс» командасының шабуыл шебінде соңғы кездері қазақстандық шабуылшы Нұрбол Әнуарбеков көбірек бой көрсетіп жүр. Жақында ол «Ордабасы» қақпасын дәл көздеп, Премьер-лигадағы дебюттік голын соқты. Ойыннан кейін 26 жастағы футболшымен KFF League тілшісі сұхбаттасқан болатын. 

 – Нұрбол, «Ордабасы» қақпасына соққан Премьер-лигадағы алғашқы голыңызбен құттықтаймыз! Сол сәттегі сезіміңіз қандай болды?

– Көп рақмет! Эмоцияның ерекше болғаны, айтпай-ақ түсінікті шығар. Бұл мен үшін өте маңызды әрі ұмытылмас сәт. Өйткені Премьер-лигадағы алғашқы голымды салды. Доп қақпа торынан өткенде, жүрегімді қуаныш кернеді. Әттең, ойынды жеңіспен аяқтай алмадық. Осы голымды отбасымa арнағым келеді. Олар маған әрдайым қолдау көрсетіп отырады.

– Сіз үшін бұл маусым нағыз серпіліс кезеңіне айналғандай. «Жеңіс» сапында тұрақты түрде негізгі құрамда шығып жүрсіз. Ал былтыр алаңда тек санаулы минуттар ойнадыңыз, Тіпті жазда «Ұлытауға» жалға жіберді. Аз уақытта не өзгерді?

– Иә, бұл маусым менің мансабымдағы алға жылжу кезеңі болды. Былтырғы жылы бапкерлер тарапынан сенім аса көп болмады. Ал биыл бәрі керісінше – тұрақты мүмкіндік беріп жатқан бапкерлер штабы мен клуб басшылығына алғыс айтамын. «Ұлытауға» жалға баруым – мен үшін мол тәжірибе болды. Сол командада негізгі құрам ойыншысы болдым және клубтың Премьер-лигаға шығуына өз үлесімді қостым.

– Шынымен де жезқазғандықтардың жоғары лигаға жолдама алуына өз үлесіңізді қостыңыз. Ал биыл сол командаға қарсы ойнадыңыз. Тіпті, аса белсенді болғаныңыз сонша, сары қағаз да алдыңыз. Егер  бұл матчта «Ұлытау» қақпасына гол соққан жағдайда, тойлар ма едіңіз?

– «Ұлытаумен» матч эмоцияға толы болды, бірақ жақсы естеліктер қалды. Дегенмен алаңда достық жоқ – тек күрес пен жеңіске деген ұмтылыс бар. Сары қағаз – ойын кезіндегі жай ғана эпизод, шабуылды үзуге мәжбүр болдым. Ал егер гол соққан болсам, командаға құрмет ретінде тойламас едім. Өйткені мен ол клубта ойнадым, жақсы адамдармен жұмыс істедім.



– Екі лигада да ойнаған тәжірибеңіз бар. Премьер-лига мен Бірінші лига деңгейінің айырмасын қаншалықты байқадыңыз? Қандай негізгі ерекшеліктерін айта аласыз?

– Айырмашылық анық сезіледі – ең алдымен жылдамдық пен ойын тәртібінде. Премьер-лигада әр сәт шешуші рөл ойнайды, кішкентай қателіктер де кешірілмейді. Бәсеке жоғары, жылдам шешім қабылдау керек. Бірінші лигада да мықты командалар мен дарынды ойыншылар бар, бірақ деңгей – басқа.

– Соңғы сұрақ: «Жеңіс» командасының чемпионаттағы алғашқы жеңісін жанкүйерлер тағатсыздана күтіп жүр. Бұл қашан болуы мүмкін?

– Бұл бағытта бәріміз жұмыс істеп жатырмыз – ойыншылар, бапкерлер, клуб басшылығы. Алла қаласа, көп күттірмей, алғашқы жеңісіміз де келеді!

– Әңгімеңізге рахмет! Сәттілік тілейміз!