Бірінші лиганың 2-тур қорытындысы: үздіктер ұпайдан шашау шығарған жоқ

17-18 сәуір күндері футболдан Бірінші лига ойындарының екінші тур матчтары өтті.

Кездесулер нәтижесі:

«Жетісай» – «Каспий» – 0:1

«Ақтөбе-Ж» – Ertis – 0:1

«Қайрат-Жастар» – «Хан-Тәңірі» – 2:1

«Шахтер» – SD Family – 4:1

«Алтай» – «Екібастұз» – 0:0

AKAS – «Түркістан» – 3:1

«Оңтүстік» – «Тараз» – 0:2

17 сәуір

«Жетісай» – «Каспий» – 0:1

Турнирдің басты фавориттерінің бірі саналатын «Каспий» сырт алаңда «Жетісаймен» өткен ойында әрең дегенде үш ұпайын қоржынға салды. Оңтүстік командасы ақтаулықтардан ойын жағынан кем түспей, тең есепке лайық өнер көрсетті. Матч та ымырасыз тең ойынға саяп келе жатқан еді. Алайда төрешінің соңғы ысқырығына санаулы минуттар қалғанда «Каспий» гол соғып, жеңісті жұлып алды.

«Ақтөбе-Ж» – Ertis – 0:1

Бірінші лиганың тағы бір фавориті де қиындықпен болса да үш ұпайға қол жеткізді. Кездесу алдында көпшілік Ertis-тің «Ақтөбе-Ж» командасын қалпақпен ұрып алады деп болжаған еді. Алайда алаң «Ақтөбе» жастары павлодарлықтарға лайықты қарсылық көрсетті. Ertis екінші таймның басында есеп ашып, сол басымдығын матч соңына дейін сақтап қалды. Айта кету керек, ойын барысында алаң иелерінің капитаны Дидар Оңғарбаев қызыл қағаз алып, командасын қиын жағдайға қалдырды. Бір ойыншы артық ойнаған павлодарлықтар үшін жеңіске жетпеу кешірілмес қателік болар еді.

«Қайрат-Жастар» – «Хан-Тәңірі» – 2:1

Турдың орталық кездесуі саналған алматылық дерби де тартысты әрі шиеленісті өтті. Екі команда да жеңіс үшін соңына дейін күресті. «Қайрат-Жастар» ойын басында екі гол соғып, басымдықты өз қолына алды. «Хан-Тәңірі» есеп айырмасын қысқартқанымен, таразы басын теңестіруге шамалары жетпеді. Осылайша алаң иелері маусымдағы алғашқы жеңісіне қол жеткізді.

18 сәуір

«Шахтер» – SD Family – 4:1

Жоғары лигаға жолдама алуды мақсат тұтқан қарағандылық «Шахтер» бұл турда сенімді жеңіске жетті. Өз алаңында SD Family командасын қабылдаған «кеншілер» қарсыластарынан басым түсіп, ірі есеп тіркеді. Бірінші таймда екі доп айырмасымен алға шыққан алаң иелері, екінші таймда тағы екі мәрте мергендік танытты. Матч соңына қарай босаңсып, қақпаларына бір гол өткізіп алғанымен, ойын тағдыры әлдеқашан шешіліп қойған еді.

«Алтай» – «Екібастұз» – 0:0

Турдағы алғашқы тең нәтиже Өскеменде тіркелді. Бұл ойын «Екібастұз» үшін сәтті аяқталғанымен, тең ойын алаң иелерінің көңіл көншітпеген рас. «Алтай» қарсылас қақпасына үш есе көп соққы бағыттағанымен, «Екібастұздың» қақпашысы Илья Сотниктің тамаша ойыны арқасында есеп ашылмады. Осылайша «Алтай» әлі де бірде-бір гол жібермеген командалар қатарында қалса, «Екібастұз» алғашқы ұпайын еншіледі.

AKAS – «Түркістан» – 3:1

Алматының AKAS клубы Бірінші лигадағы тарихи жеңісіне қол жеткізді. Өз алаңында «Түркістанды» қабылдаған команда сенімді әрі лайықты жеңіске жетті. Бірінші таймда екі гол соққан AKAS екінші тайм бастала сала үшінші голды еншілеп, матч тағдырын шешіп тастады. Қонақтар тек қосымша уақыттың соңғы минутында ғана жұбаныш голын соқты.

«Оңтүстік» – «Тараз» – 0:2

Оңтүстік дербиінде қонақтар жеңіске жетті. Бірінші тайм тең дәрежеде өткенімен, үзілістен кейін «Тараз» басымдықты толық өз қолына алып, лайықты жеңіске жетті. Матч соңында алаң иелері бір ойыншысынан айырылып, кездесуді он футболшымен аяқтады. Екі тур қорытындысы бойынша «Оңтүстік» ұпай да, гол да соға алмай алмай, турнир кестесінің соңына сырғыды.

Үшінші тур ойындары:

24 сәуір

«Түркістан» – «Жетісай»

«Екібастұз» – «Ақтөбе-Ж»

SD Family – AKAS

«Каспий» – «Оңтүстік»

25 сәуір

«Тараз» – «Алтай»

Ertis – «Қайрат-Жастар»

«Хан-Тәңірі» – «Шахтер»