Нүркен Мырзағалиев: Бұл турдағы матчтар өте тартысты өтеді

 

Бұл кездесу екі ұжым үшін де оңайға соқпайды. «Жетісу» құрамындағы бірнеше ойыншы Бірінші лигада өнер көрсеткенімен, қазіргі таңда команда өз стилін қалыптастырып үлгерді. Сондықтан олар жеңіске жетуге, гол соғуға құштар. Ал «Ордабасының» шабуылында да, мүмкіндіктерді пайдалану жағынан да мәселе бар. Бұл «Хан-Тәңірімен» Кубок жолындағы өткен ойында айқын байқалды. Матч қызықты өтетіні сөзсіз, бірақ жеңімпазды тап басып айту қиын.

 

Бұл жұптың фавориті айқын. Матч сапалы әрі табиғи алаңда өтеді. Бұл «Астана» үшін маңызды фактор, өйткені елордалық ұжым сапында табиғи алаңда өз деңгейін көрсете алатын футболшылар жетерлік. Дегенмен, Виталий Жуковский жаттықтыратын «Тұран» — тәжірибелі ойыншылармен жасақталған ұжым. Десе де бұл кездесуде елордалықтар аз ғана басымдықпен жеңіске жетеді деп ойлаймын.

 

Бұл матчта да барлығы түсінікті сияқты. Қазір «Қайраттың» қарқыны керемет, тіпті, лигадағы ойыны жолға қойылған жалғыз команда деуге болады. Алматылықтар әр ойында гол соғуға көп мүмкіндікке ие болуда. Шабуыл шебінде керемет формадағы Дастан Сәтпаев тұрақты түрде гол соғып жүр. «Қайсардың» құрам мәселесін ескерсек, қонақтар сенімді жеңіске жетеді деп ойлаймын.

 

Екі команда да маусымды сәтсіз бастады. Бірақ жақында «Қызылжар» Қазақстан Кубогінде «Қайсарды» жеңіп, маңызды жеңіске қол жеткізді. Бұл жеңіс оларға қосымша мотивация болғаны анық. Жалпы алғанда, құрам жағынан «Қызылжар» «Атырауға» қарағанда басымырақ — мұны мойындау керек. Сондықтан бұл кездесудегі үш ұпай петропавлдықтарға бұйырады деп ойлаймын.

 

Екі команда да өз стилі бар ұжымдар. Дегенмен, бұл командаларға аса үлкен үміт артылмайды. Десе де бұл матч қызықты болуға тиіс. Андрей Ферапонтовтың командасы өзінің ойын үлгісі мен тактикасының арқасында Жезқазғаннан ұпай олжалап қайтуы мүмкін.

 

Бұл екі команда да жақсы ұйымдастырылған, әсіресе қорғаныс жағынан. Кездесу екі тарапқа да оңай болмайды, сондықтан нақты фаворитті атау қиын. Дегенмен, қағаз жүзінде «Елімай» құрам, бюджет және басқа да көрсеткіштер бойынша басым деп ойлаймын. Алаң иелерін де осал деп айтуға келмейді, әсіресе «Ақтөбені» жеңген соң. Сондықтан бұл матчта тартысты ойын мен аз гол күтемін.

 

Бұл командалар нақты бір стильмен ерекшеленбесе де, құрамында жекелеген мықты ойыншылар бар – әсіресе шабуыл шебінде. «Тобылда» – Чесноков, Сигневич және жарақатына қарамастан маңызды ойыншы саналатын Эль-Мессауди бар. Оның қатарға қосылуымен команда күшейеді. Ал «Ақтөбеде» – Идрис Умаев, Жайро Жан және жақсы ойнап жүрген Дархан Бердібек бар. Қызықты әрі нәтижелі тең ойын болады деп сенемін.