Екінші лиганың алғашқы туры: астаналық дербидегі ірі жеңіс, дебютанттың сәтсіздігі және жалғыз тең ойын

 

«Ордабасы-Ж» – «Талас» – 0:1

 SD Family – «Жеңіс Жас» – 1:6

 «Жетісу-Ж» – «Шахтер-Ж» – 0:2

 «Каспий-Ж» – Jeiran – 2:0

 «Тобыл-Ж» – «Елімай-Ж» – 2:1

 «Астана-Ж» – «Қызылжар-Ж» – 5:1

 «Мақтаарал» – «Тұран-Ж» – 4:0

 «Оқжетпес-Ж» – «Алтай-Ж» – 1:4

 «Қайсар Жас» – «Атырау-Ж» – 2:2

 «Жас Қыран» – «Жайық» ойыны кейінге шегерілді.

 

Маусымның бірінші турындағы алғашқы ойын күні астаналық екі команда – SD Family мен «Жеңіс Жас» арасындағы матч ерекше нәтижемен есте қалды. Бір қаланың қос командасы кездескен ойында жанкүйерлер жеті голдың куәсі болды. Соның алтауы алаң иелерінің қақпасына соғылды. «Жеңіс Жас» ойыншысы Батырхан Камарадинов маусымдағы алғашқы голдың авторы атанып қана қоймай, хет-трик жасап, мергендігімен көзге түсті.

 

Сол күні астаналық дербимен қатар тағы үш матч өтті. Шымкенттегі «Ордабасы-Ж» мен Қаратаудың «Талас» арасындағы кездесудің бірінші таймында соғылған жалғыз гол қонақтарға жеңіс сыйлады.

 

Алматыда «Жетісу-Ж» Қарағандының «Шахтер-Ж» командасын қабылдап, 0:2 есебімен ұтылып қалды. Бұл ойында Екінші лигадағы алғашқы қызыл қағаз көрсетілді: «Жетісу-Ж» жартылай қорғаушысы Бекберген Құдайберген екі сары қағаз алып, алаңнан қуылды.

 

Қостанайдың «Тобыл-Ж» клубы маусымды жеңіспен бастады. Өз алаңында Семейдің «Елімай-Ж» клубын қабылдап, 2:1 есебімен басым түсті. Бірінші таймның соңында қонақтар сапынан Әділет Сейілханов алаңнан қуылып, командасын қиын жағдайға қалдырды. «Тобыл-Ж» бұл басымдықты тиімді пайдаланып, екінші таймда екі гол соқты. «Елімай-Ж» бір ойыншы кем болып ойнаса да есеп айырмасын қысқарта алды, бірақ таразы басын теңестіруге шамасы жетпеді.

 

«Каспий-Ж» алғашқы турда өз алаңында Екінші лигаға жаңадан қосылған Jeiran клубын қабылдап, дебютантқа алғашқы ойында жеңістің тәтті дәмін татуға мүмкіндік бермеді. Матчтың 90-минутына дейін алматылықтар ұпай алуға жақын еді, бірақ қосымша уақытта екі гол жіберіп алып, сәтсіздікке ұшырады.

 

Екінші ойын күні «Астана-Ж» мен «Қызылжар-Ж» арасындағы матчпен басталды. Петропавлдықтар есепті бірінші болып ашып, бірінші таймда жеңіп тұрғанымен, үзілістен кейін астаналықтар ойынды толықтай өз бақылауына алды. Бұл кездесудің басты қаһарманы – 18 жастағы Арсен Ахметов. Ол алдымен сары қағаз алып, кейін қарсылас қақпасына үш гол соғып, хет-трик жасады.

 

Тағы бір ірі жеңіс Түркістан облысының екі командасы – «Мақтаарал» мен «Тұран-Ж» арасындағы матчта тіркелді. Кезінде Премьер-лигада ойнаған тәжірибелі «Мақтаарал» түркістандық «жастарға» еш мүмкіндік қалдырмады: алғашқы таймда үш, екінші таймда тағы бір гол соғып, 4:0 есебімен басым түсті.

 

«Алтай-Ж» сырт алаңда «Оқжетпес-Ж» ұжымын ойсырата жеңді. Бірінші тайм тең аяқталғанымен (1:1), екінші таймда «Алтай-Ж» алға шығып алды. Кейіннен алаң иелерінің бір ойыншысы алаңнан қуылған соң басымдықты тиімді пайдаланды. Қорытынды есеп – 1:4.

 

Турдың қорытынды ойыны Қызылордада өтті. «Қайсар Жас» пен «Атырау-Ж» арасындағы ойында қызылордалықтар екі рет есепте алға шыққанымен, «Атырау-Ж» екі ретінде де таразы басын теңестіріп үлгерді. Осылайша бірінші турдағы жалғыз тең ойын тіркелді.